“الفلوس بتجيب سعادة أكتر بكتير”.. أبرز تصريحات محمد رمضان

كشف النجم محمد رمضان عن السر وراء جملته الشهيرة “ثقة في الله نجاح”، التي يرددها دائمًا في لقاءاته وعلى منصات التواصل الاجتماعي، مشيرًا إلى أنها نابعة من تربيته البسيطة وتأثير والديه عليه.

وقال رمضان: “أبويا وأمي ناس بسيطة جدًا، بس إدوني اللي أتمنى أدي لأولادي ربعه، القناعة والإحساس بالغير، عمري ما طلبت من أبويا حاجة مش في استطاعته يجيبها، وأمي كانت بتقول لي خليك واثق في ربنا، انت معاك أقوى واحد اللي خلق الدنيا، فزرعوا جوايا الكلمة اللي بقت في لساني.”
و خلال لقائه مع رائدة الأعمال دينا غبور، أجاب محمد رمضان عن الانتقادات التي تطاله بسبب أزيائه الغريبة وتفاخره بسياراته الفاخرة، موضحًا أن ذلك كان جزءًا من استراتيجيته الفنية للوصول إلى الجمهور الإفريقي، حيث قال:
“لبست ملابس غريبة وقت ما كنت بستهدف الجمهور الإفريقي، والاستايلست بتاعي من 2019 نيجيري، كنت عايز ألبس زيهم وأقرب منهم وما يحسوش بغربة.”

وأكد أنه لم يكن ليرتدي هذه الأزياء في أعمال مثل “ابن حلال”، مضيفًا:
“أكيد طبعا هنهدى، أنا كنت في فترة وخلصت، وهبقى شخص عبيط لو هلبسه تاني، أنا كان كل طموحي أثبت نفسي فنيا، ولله العظيم ولا عمري فكرت في الفن لأنه هيجيب لي فلوس كتير، ماديا أنا راضي ومبسوط.”

و تحدث رمضان أيضًا عن نظرته للثراء، مؤكدًا أن المال يجلب السعادة عندما يُستخدم لمساعدة الآخرين، وقال:
“الفلوس بتجيب سعادة أكتر بكتير، فكرة إنك تقدر تساعد حد محتاج أو تنقذ شخص من مشكلة، دي حاجة بتديك إحساس بالنجاح، الفلوس اسمها مادة، والمادة دليل نجاح، وأنا مؤمن إن أي شيء مش بيتحول لمادة ما تعملوش.”

على صعيد آخر، يستعد محمد رمضان للمشاركة في مهرجان كوتشيلا للموسيقى والفنون، الذي يقام في ولاية كاليفورنيا خلال أبريل 2025، كما ينشغل حاليًا بتصوير أحدث أفلامه “أسد”، المتوقع أن يكون إضافة قوية لمسيرته الفنية.