أعلنت الإعلامية ياسمين عز، خلال تقديمها برنامجها "كلام الناس"، المذاع عبر شاشة قناة MBC مصر، عن قرب زفافها وذلك في معرض ردها على إحدى المشاهدات حول سر الزواج الناجح من وجهة نظرها.
وردت ياسمين، على سؤال المتصلة قائلة: "أنا هقولك بشكل عام لأني في الطريق للجواز، وأنا شايفة من تجربة أهلي، إن الست عمود البيت والست بذكائها وحكمتها وعقلها واحتوائها وقدرتها على استيعاب الأمور مع الرجل وتقبل اختلافه، والموضوع اللي مش محتاج من الست أنها تتخانق مع جوزها بلاش تتخانق، الرجل كائن لا يعبر ولا رغاي، الست تكون صبورة وتدلعه ولو شايفين إن اللي بقوله تفاهة لن تفلحوا مع الرجل، أنك تدلعي الرجل صنعة".
وواصلت: "لو فيه واحدة خرساء اتجوزت هتلاقوا أن الشكاوى من اللسان الطويل والرد خلصت، متقوليش أنا طيبة واللي في قلبي على لساني، لأ متقوليش اللي في قلبك قدام جوزك".
كما أوضحت أنها لا تقبل أن يدخل زوجها في علاقة مع امرأة أخرى، قائلة: "عمري ما قولت لو جوزك في علاقة مع واحدة متزعليش ده محبوب، أنا مقبلش إن جوزي يكون في علاقة مع واحدة، ولكن أفرح لما يكون محبوب".
تخفيف عن الرجل
ووجهت ياسمين نصيحة للسيدات، قائلة: "بمناسبة الصيف اللي إحنا فيه، ووقف تخفيف الأحمال، مش ناوية تخففي على الراجل اللي جنبك ده؟ حتة البسبوسة اللي جنبك، قولي له شكلك وشعرك وطولك حلو، دلعي الراجل هو مبيدلعش ومسكين، قولي له أنت راجل بروماكس".
وواصلت: أحمالك هتخف لما تخففي أحمال جوزك، هتعيشي سعادة وهتروح الأحمال وهتحققي الأحلام، أول ما الأحمال بتخف الأحلام بتتحقق، وحياتكم هتمشي لقدام".
واختتمت ياسمين كلامها قائلة: "كل واحدة معاها راجلها تخاف عليه وتمسك فيه، لو شاريكي وبيحبك وجوزك تحملي علشان خاطره، مش هتلاقي زيه وهتندمي يوم لا ينفع الندم، دايمًا بيقولوا خدوا النصيحة من امرأة سعيدة، وأنا سعيدة واسمعي كلامي أنا عايزة مصلحتك".
[email protected]
أضف تعليق