الإعلامي محمود سعد عن والده: الراجل ده مبحبوش ولا بحترمه

أثارت تصريحات الإعلامي المصري، محمود سعد، حول طبيعة علاقته مع والدة، ضجة كبيرة، وذلك في بث مباشر عبر صفحته الرسمية على موقع (فيسبوك)، وأكدّ أنه لا يحب والده ولا يحترمه.

فقال "يوم ما انتقل والدي إلى جوار الله، كنت بقول إني مش هزعل لأن بيني وبينه هجر وغدر، وجرح في قلب، بيني وبينه طريق وفراق وطريق هو اللي بدأه، والدتي فضلت 27 سنة تربي في 4 عيال، مهتمتش ولا استمتعت بحياتها، أسرتها كانت عادية، لكن ربنا ساعدها".

وعن وفاة والده، قال "ولما والدي توفى كنت في مكتبي، والدتي بلغتني وطلبت مني أروح له بسرعة، وبالفعل، سيبت الشغل ونزلت، والدي كان موصي أخويا الكبير قبل ما يموت أنه يدّفن مع جدتي من أمي لأن كان بيحبها جدًا، والدتي طلبت مني أنزل نعي في الجورنال، قولت لها الناس متعرفش إني ليا أب أصلا لكن أمي أصرت على إننا نعمل عزاء".

وأضاف "لما والدي توفى متأثرتش ولا كنت حاسس بحاجة، أنا حتى مش فاكر هو مات امتى، أبويا كان خالع نفسه من حياتنا رغم إنه كان غني، ورغم إن تربية أمي نجحت ومطلعتش مجرم ولا صايع، لكن لغاية دلوقتي لما أسمع حد بيتكلم عن أبوه بتضايق، ولما كبرت بقيت أقول أبويا قالي إيه أو إيه الذكرى اللي سابهالي ملقتش حاجة"

واختتم حديثه "لكل أب مبيسألش على عياله، مراتك إنت وهي أحرار، لكن العيال هتكبر ومش هتنسى، هتفضل تيجي سيرتك بشكل مش كويس، وإنك تسأل على عيالك دي مش رحمة ولا مودة منك دا واجب، إزاي تصب غضبك من مراتك على عيالك؟".